جريدة مغربية بريس
القنيطرة ………………..قسم التحرير
بعد سنين من الركود الثقافي والفني، مدينة القنيطرة كتستعد باش تنظم أول نسخة من المهرجان الثقافي والسياحي ديالها، فواحد المبادرة اللي لقات استحسان كبير عند الساكنة وحتى الزوار ديال المدينة. هاد المهرجان غادي يتدار ما بين 23 و25 غشت 2025، وغادي يكون خطوة جديدة فطريق رد الاعتبار لهاد المدينة اللي بقات مهمشة ثقافياً بزاف ديال السنين.

المبادرة جات بتوجيه ودعم كبير من عامل الإقليم، السيد عبد الحميد المزيد، اللي باين عليه باغي يعطي نفس جديد للمدينة، ويرجع ليها النبض ديال الفن والثقافة والسياحة، ويحيي روحها اللي كانت نايمة.
دابا ومع اقتراب الموعد، كاين حركة غير مسبوقة فالشوارع والفضاءات العمومية، تحضيرات وناس كيسولوا وكيشوقوا شنو غادي يكون فهاد المهرجان. واللي باين، هو أن المدينة كلها غادي تعيش واحد الحركية زوينة فهاد الثلاث أيام.
شنو غادي يكون فهاد المهرجان؟

المهرجان غادي يخلط ما بين التراث والحداثة، وغادي يعرف حضور فنانين من داخل القنيطرة ومن باقي المدن، وكاينين بزاف ديال الأنشطة:
سهرات فنية وموسيقية
عروض فروسية تقليدية
أنشطة رياضية فملاعب القرب
أنشطة بحرية فشاطئ المهدية
ندوات فكرية ولقاءات ثقافية
أنشطة للأطفال والعائلات
وغادي يكونو حتى فضاءات بحال ساحة المحطة وقاعة الوحدة مستعدين لاستقبال الجمهور فهاد المناسبات.
والفلوس؟ شكون مول هادشي؟
بعض الناس بداو كيهضرو ويشكو فطريقة التمويل، خصوصاً من بعد ما خرج نائب برلماني وقال بللي الجماعة عطاتو 4.8 مليون درهم لجمعية المهرجان. لكن المعطيات الرسمية كاتقول العكس: الجماعة ساهمات بـ100 مليون سنتيم فقط، ووزارة الداخلية هي اللي مولات الجزء الكبير بـ380 مليون سنتيم، فإطار سياسة عامة باش يدعمو الثقافة فالمناطق المحلية.
والمصادر كتأكد أن كولشي مشى قانونياً، وماكاين لا تجاوز لا خروقات، وكلشي موثق ومراقب.
آش كيعني هاد المهرجان للقنيطرة؟
الناس فرحانين، وكاين تفاعل كبير على مواقع التواصل. بزاف شافو أن هاد المبادرة غادي ترجع الأمل لشباب المدينة، وتخلق دينامية اقتصادية جديدة، وتشجع السياحة الداخلية، وتبرز المؤهلات اللي عند القنيطرة اللي كانت منسية.
ناس بزاف طالبو باش يتحول هاد المهرجان لتقليد سنوي، باش تبقى القنيطرة حاضرة فخريطة المهرجانات الثقافية المغربية، وتخرج من العزلة اللي دامت سنين.
القنيطرة كتفيق من جديد… والبداية مهرجان، والباقي على الطريق.