اختطاف سيدة فسيدي بنور بطريقة أفلام العصابات.. والسبب ملايين السنتيمات!

مغربية بريس

متابعة خاصة …….قسم الأخبار

في واقعة غريبة بحي السعادة فسيدي بنور، تعرضات سيدة لعملية اختطاف خططات ليها عصابة محترفة، بعدما عرفو بأنها بايعة عقار بملايين السنتيمات. القصة كلها بدات فنهار عادي، السيدة كانت خارجة للحمام، حتى لقات راسها وسط سيناريو بحال الأفلام، طوموبيل وقفات حداها، خرج منها شخص متنكر فلباس نسائي، لابس كمامة باش مايتعرفش، وقبل ما تفهم شنو كاين، كانت مخطوفة فالطوموبيل وغاديين بيها لوجهة مجهولة.


العصابة كانت على يقين بأن السيدة عندها الفلوس، ولكن ماكانوش عارفين فين مخبيّاهم. دارو ليها ضغط باش تكشف ليهم على المكان، وبالفعل، صيفطو واحدين من العصابة لدّارها باش يجيبو الفلوس. ولكن الصدمة كانت قوية عليهم! السيدة كانت ذكية، وماخباتش الفلوس فالدار، بل دارتهم فالحساب البنكي، وهنا العصابة لقات راسها واقفة قدام الحائط، بلا خيار آخر.
في الأخير، وبعد ما عاقو بالعملية ما غاديش تمشي كيفما خططو ليها، قررو يطلقو السيدة ويمشيو فحالهم. الواقعة خلفات صدمة فالحي، والفيديو لي توثق لحظة الاختطاف انتاشر بسرعة فوسائل التواصل الاجتماعي، مما زاد الضغط على المصالح الأمنية باش تتحرك وتطيح بالمجرمين.
التحقيقات دابا فطريقها، والسؤال لي كيتطرح: واش هاد العصابة غادي تنجى بفعلتها؟ ولا الأمن غادي يطيح بيهم؟ الأيام الجاية غادي تكشف المستور!

اعجبك المقال؟ يمكنك مشاركته من خلال منصتك المفضلة
اترك تعليقا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد