الفراشة يكشفون تجاوزات بعض تجار الخبازات أمام عامل القنيطرة

مغربية بريس

متابعة خاصة …….قسم الأخبار

 

فواحد المشهد غير مسبوق، خرج عامل إقليم القنيطرة، عبد الحميد المزيد، ليلة الاثنين، في جولة ميدانية بساحة المسيرة في حي الخبازات، باش يراقب تطبيق قرارات تحرير الملك العمومي، ويتواصل بشكل مباشر مع الفراشة والتجار. لكن المفاجأة كانت فالشكايات اللي جاو بها الفراشة، واللي كشفو فيها تجاوزات بعض أصحاب المحلات التجارية.


عدد من الفراشة اللي كانو حاضرين اشتكاو قدام العامل من بعض التجار اللي ما كفاهمش المحل ديالهم، وكيحتلو الرصيف قدام الحوانت ديالهم، وكاين حتى اللي كيكريو أجزاء من الرصيف بطريقة غير قانونية، مقابل مبالغ مالية، في الوقت اللي السلطات كتقوم بحملات متكررة على الفراشة فقط. “علاش كتحيدونا حنا، وتخليوهم؟” تساؤل طرحوه الفراشة على العامل، وطلبو منه يتدخل باش يتطبق القانون على الجميع بدون استثناء.


هاد الشكايات خلاّت العامل يتفاعل بشكل جدي، حيث أكد أن الهدف ديال تحرير الملك العمومي ماشي التضييق على شي طرف، ولكن تنظيم الأمور وإنهاء الفوضى اللي كتعاني منها المنطقة. وطلب من الجميع التعاون مع السلطات المحلية باش تنجح هاد العملية.


فهاد الجولة، كان العامل مرفوق بعدد من المسؤولين، بحال الكاتب العام للعمالة، ورؤساء أقسام الشؤون الداخلية والجماعات المحلية والمعدات والتزيين، وشافو عن قرب كيفاش بعض المحلات التجارية كاتستغل الملك العمومي بطرق غير قانونية، بحال تثبيت واجهات حديدية، وعرض السلع خارج المحلات، وحتى كراء أجزاء من الرصيف.
الرسالة كانت واضحة: القانون غادي يطبق على الجميع، وما غيكونش تمييز بين الفراشة والتجار، وكل احتلال للملك العمومي خاصو يتحيد، باش تبقى القنيطرة منظمة وتحترم حقوق الجميع.

اعجبك المقال؟ يمكنك مشاركته من خلال منصتك المفضلة
اترك تعليقا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد