مغربية بريس
متابعة خاصة …..قسم الأخبار
فالقنيطرة، ما بقا غير الصرامة والمراقبة اللّي كتحمي صحة المواطنين، وهاذ الشي باين فالحملة الأخيرة اللّي دارها القائد الممتاز فيصل مطيشي، المسؤول على الملحقة الإدارية 11، واللّي خرج للميدان مع لجنة مختلطة باش يضبطو المواد الفاسدة فالمحلات التجارية، المقشدات والمحلبات.

هاد الحملة طاحت على كميات كبيرة ديال المواد المنتهية الصلاحية، بحال العصائر وألبانا و المواد المعلبة “رايبي جميلة “،وغيرها اللّي باقيين معروضين للبيع بلا حشمة ولا حيا، رغم أنهم خطر على صحة الناس. اللجنة اللّي كانت كتراقب، فيها السلطات المحلية، المكتب الوطني للسلامة الصحية (ONSSA)، المكتب الصحي الجماعي، مراقبو الشرطة الإدارية، الأمن الوطني، والقوات المساعدة، وكلشي كان خدام باش يضمن سلامة المواطنين.

اللي زاد الموقف خطورة هو أن بعض المحلات ما فيهاش شروط النظافة نهائياً، واللّي خلا اللجنة تحرر محاضر قانونية ضد المخالفين وتطبّق العقوبات اللازمة، باش يكونو عبرة لغيرهم. وهاد الحملات ما غاديش تسالي، بل غادي تستمر وتشمل المقاهي، المطاعم، والأكشاك فالقنيطرة، باش أي واحد كيتلاعب بصحة الناس يخلص الثمن.
السلطات دعات المواطنين ياخدو الحيطة والحذر ويشوفو تواريخ الصلاحية ديال المنتجات قبل ما يشريوها، حفاظًا على صحتهم. أما القائد الممتاز فيصل مطيشي، فباقي محيح، كيحارب أي تلاعب بصحة المستهلكين، وكيعطي المثال ديال رجل السلطة اللي كيدير خدمتو بجدية وبلا تهاون.
القنيطرة اليوم فطريقها تكون مدينة خالية من المواد الفاسدة، والفضل كيرجع للمجهودات ديال السلطات والرقابة المستمرة.