مغربية بريس
متابعة خاصة …….قسم الأخبار
عرفات دورة مجلس جماعة القنيطرة لي تعقدات نهار الاثنين فوضى عارمة ومشادات كلامية حادة، وصلات لدرجة التهجم على الرئيسة أمينة حروزى، لي تعرضات لهجوم مباشر حتى لمقعدها، فواحد المشهد لي عمر مجلس جماعي فالقنيطرة ما شاف بحالو.
مصادر من داخل الجلسة أكدت بلي الرئيسة تعرضات لمضايقات كبيرة، الشي لي خلاها تخرج بتصريح قوي كتقول فيه: “عيطو على البوليس، عندنا ما يُݣَالْ، زمن الفوضى وزمن البيع والشراء انتهى”، فإشارة واضحة بليها مستعدة تواجه أي محاولات ديال البلطجة داخل المجلس.
عامل إقليم القنيطرة غاضب

حسب مصادر مطلعة، عامل الإقليم ما عجبوش الحال نهائيا من لي وقع، وكيقلب على تفاصيل الحادث، باش يشوف واش غادي يتم فتح تحقيق رسمي فالموضوع، خصوصا وأن التقارير الأولية وصلات ليه كتكشف على حجم الفوضى لي عرفاتها الدورة.
شكون هاد الشخص لي تهجم على الرئيسة؟

السؤال لي كيدور دابا فالكواليس هو شكون هاد الشخص لي تسبب فهاد العرقلة، واش عندو الصلاحية باش يوقف الجلسة بهاد الشكل؟ وكيفاش تسمح ليه يدخل بهدا الأسلوب؟ مصادر مقربة من الرئيسة قالت بليها مغاديش تسكت على الواقعة، وغادي تطالب بالتحقيق ومعاقبة المسؤولين على هاد الفوضى.
المسؤولية على من؟

المجلس الجماعي القنيطري اليوم قدام اختبار حقيقي: إما يكون فضاء ديال النقاش الديمقراطي واحترام المؤسسات، وإلا غادي يبقى حلبة للصراعات الشخصية والبلطجة. دابا الأنظار كلها موجهة نحو عامل الإقليم باش نشوفو شنو غادي يدير، واش غادي يكون رد صارم يوقف هاد التجاوزات، ولا غادي يتم التعامل مع الموضوع ببرودة؟ الأيام الجاية كتحمل معها بزاف ديال الأسئلة، والساكنة كتشوف وتنتظر.