مغربية بريس
متابعة خاصة ……..قسم الأخبار
ماشي غير المحلات والقهاوي اللي كتحط علامات إشهارية بلا ترخيص، حتى بعض العيادات الطبية دخلات فهاد الفوضى، وولات كتعلق لوحات إشهارية كبيرة فوق البنايات أو فالواجهات ديال العمارات بلا أي سند قانوني. هادشي خلق واحد المشهد عشوائي وسط المدينة، وزاد من انتشار الفوضى فالمجال الحضري.
حملة السلطات مستمرة ضد الإشهار العشوائي
السلطات المحلية فالقنيطرة، بقيادة الباشا خليفة بن شريج والقياد ديال الملحقات الإدارية المعنية، زادت من المجهودات ديالها فهدم وإزالة اللوحات الإشهارية غير المرخصة، هاد المرة حتى العيادات الطبية ما سلموش من الحملة.
اللجان المكلفة دارت معاينات فالحيط، وحرّرات محاضر قانونية ضد المخالفين، وعطات أوامر فورية لإزالة جميع العلامات اللي معلقة بلا ترخيص. كما أن الشرطة الإدارية وقسم الجبايات دخلو على الخط باش يتأكدوا واش هاد العيادات كتحترم القوانين التنظيمية ولا لا.
عدد من المواطنين عبّرو على ارتياحهم بهاد التدخل، حيث كيشوفوه خطوة مهمة باش المدينة تبقى منظمة وما تبقاش العشوائية طاغية حتى فالمجال الصحي. كيقول واحد المواطن: “مايمكنش نكونو فمدينة كتحاول تنظّم الفضاء العام، ونشوفو حتى العيادات الطبية كتلصّق علامات بحال شي حانوت صغير فشي زنقة!”
لكن بعض الأطباء وأصحاب العيادات تفاجؤو بالحملة وقالو أن بعضهم ماكانش عارف بأن هاد العلامات خاصها ترخيص رسمي، وكيطالبو بمهلة باش يسوّيو وضعيتهم القانونية بلا ما يتعرضو لعقوبات ..
السؤال اللي كيبقى مطروح هو واش السلطات غادي توسّع هاد الحملة حتى لقطاعات أخرى؟ ولا غادي تبقى مقتصرة على الإشهار العشوائي ديال المحلات والعيادات فقط؟
الأيام الجاية غادي توضّح شحال هاد الحملة غادي تستمر وشكون الفئات اللي غادي تشملها، ولكن المؤكد أن القنيطرة بغات تحارب العشوائية بكل أشكالها، واللي مخالف غادي يكون تحت طائلة القانون!