مغربية بريس
متابعة خاصة…… قسم الأخبار
اهتزات مدينة القنيطرة صباح اليوم على وقع حادث خطير بعدما تسرب الغاز فواحد المعمل ديال شركة “يازاكي”، الشي اللي خلا أكثر من 20 عامل وعاملة يتصابو بحالات اختناق وتسمم، واضطرات سيارات الإسعاف تنقلهم فحالة مستعجلة لسبيطار الإدريسي باش يتلقاو العلاجات الضرورية.
وحسب المعطيات الأولية، التسرب وقع فواحد البلاصة مغلقة داخل المعمل، واللي خلا الغاز ينتاشر بسرعة ويخلي العمال يحسو بالدوخة، الغثيان، وصعوبة فالتنفس، وهذشي اللي خلا التدخل الطبي يكون فوري قبل ما تسوء حالتهم.
السلطات المحلية والوقاية المدنية ما ضيعوش الوقت، وجاو بعين المكان باش يسيطرو على الوضع، فحين اللي بدات الجهات المختصة تحقيقاتها باش تعرف سبب التسرب وكيفاش وقع.
كاين اللي كيهضر على مشكل فالتهوية، وكاين اللي كيشك فخلل فواحد الآلة داخل المعمل، ولكن التحقيق غادي يكشف الحقيقة فالقريب.
هذ الحادث رجع الحديث على إجراءات السلامة فالمعامل ديال القنيطرة، خصوصًا وأن المنطقة الصناعية عامرة بآلاف العمال اللي كيخدمو فظروف قاسية، واللي خاص تكون عندهم ضمانات تحميهم وتحفظ صحتهم. هل غادي تكون إجراءات صارمة بعد هذ الفاجعة؟ الأيام الجاية غادي تبين.