من “الميكا” للكارثة.. السلطات المحلية تحبط فضيحة الزيتون المسموم بالقنيطرة ومطالب بتفتيش مستودع المزود الرئيسي

جريدة مغربية بريس 

القنيطرة……..  قسم الأخبار 

عاشت مدينة القنيطرة هاد الأيام على وقع صدمة كبيرة من بعد ما تفجرت فضيحة زيتون فاسد ومُدود، اللي كان غادي يتهرّب للأسواق ويتباع للمواطنين بلا مراقبة.

القضية بدات من حملة عادية ديال جمع الأكياس البلاستيكية (الميكا) فـ “مارشي الحرية”. اللجنة الإقليمية المختلطة اللي كانت مكونة من السلطة المحلية، ممثلين على القسم الاقتصادي، “لونسا”، القسم الصحي الجماعي، ورجال الأمن الوطني، صادفات واحد المحل اللي صاحبو رفض يعطي كمية صغيرة ديال الميكا، وقال للجنة باللي كيستعملها فالزيتون.

هنا دخلات الشكوك، وتقرر يفتشو المحل، وفجأة لقاو براميل كبار عامرين بزيتون خاسر وخانز، حتى دود كاين فيه. الكمية اللي تحجزات فهاد المرة وُصلات لجوج طن، وكلشي كان بعين القائد ديال الملحقة الثالثة بالنيابة شرف الدين السوسي، وباشا المعمورة خليفة بن شريج.

المواد الفاسدة تحجزات وتدار عليها محضر، ومن بعد تم إتلافها رسمياً، وفتحات النيابة العامة تحقيق اللي خرج باعتقال صاحب المحل.

لكن القضية ما سالاتش هنا، حيث بعد 3 أيام رجعات نفس اللجنة هاد المرة بحضور القائدة ليلى بن جلون، وفجأة لقاو براميل أخرى محطوطين قدام محل مهجور فزنقة ثالثة وسط السوق، والكمية هادي المرة وصلات حتى لـ 3 طن، بنفس النوعية ديال الزيتون الفاسد والمدود.

هاد الفضيحة الكبيرة عرات شبكة خطيرة كانت غادي توصل السموم ديالها لآلاف المواطنين، والبحث باقي جاري حتى يوصلو للمزود الرئيسي اللي كيقال باللي كاين فـ “الساكتية” وعندو أطنان ديال الزيتون الفاسد مخزنها.

ناس القنيطرة كيطالبو اليوم بصرامة أكثر ومتابعة هاد المافيا اللي لعبات بصحة المستهلك، وبفضل يقظة السلطات المحلية والأجهزة
المختصة، تم إنقاذ آلاف الأرواح من كارثة صحية خطيرة.

وطالب عدد من المهنيين والساكنة بضرورة التحرك العاجل لتفتيش المستودعات الكبيرة التابعة للمزود الرئيسي المتواجد بحي الساكنية والفوارات، حيث راجت أخبار على أن عندو أطنان أخرى من الزيتون الفاسد مخزنة، وهو ما كيستدعي تدخّل صارم من طرف السلطات المحلية والأجهزة المختصة قبل ما يتسرب هاد السم للمواطنين.

تعليقات (0)
أضف تعليق